Siglir tar il cuntegn

Svizra Contracts cun plattafurmas da reservaziun vegnan examinads

Blers hoteliers svizzers sa sentan restrenschids en lur libertad da manar lur hotel. Els na dastgan betg far pretschs pli bass che quai ch'igl è fixà en il contract cun ina plattafurma da reservaziun. La clausula da paritad da pretschs è fixada là. Schliar il contract n'è dentant nagina opziun.

ina dunna sesa davant in laptop e guarda en l'internet
Legenda: Adina dapli persunas reserveschan la chombra da hotel sur in portal da reservaziun. Keystone

Il Cussegl dals chantuns ha approvà oz la moziun da Pirmin Bischof (PCD/SO) che vul deliberar ils hoteliers da la clausula da paritad. Uschia pudessen ils hoteliers era offrir lur chombras pli bunmartgà e surmuntar ina fasa cun damain reservaziuns.

Adina dapli reservaziuns sur l'internet

Actualmain creschan las reservaziuns sur plattafurmas sco booking, trivago u expedia. Ils hoteliers èn sfurzads da far in contract cun da questas plattafurmas per restar preschent en la rait. Senza preschientscha virtuala - nagins giasts. Hotelleriesuisse beneventa perquai er la moziun da Bischof. I pudess dentant ir pli spert. Ils pajais vischins, Germania, Frantscha ed Italia han gia decidì e realisà il scumond da la clausula da paritad. L'Austria ha decidì da metter en vigur quest scumond l'emprim da schaner 2017. Il mument è la Svizra pia in'insla.

Il Grischun è main pertutgà

Tenor il president da hotelleriesuisse, Andreas Züllig, è la situaziun en il chantun Grischun main tendida. La gronda part dals giasts da hotel en il Grischun sajan giasts da tschep. Questas persunas reserveschian lur vacanzas anc sin la moda tradiziunala cun telefon u e-mail, uschia di Züllig. Tuttina saja natiralmain er la hotellaria grischuna pli libra sche questa clausula dispitaivla vegnia scumandada.

RR actualitad 17:00