La controlla ha oravant tut examinà l'efficacitad da las subvenziuns da l'Uffizi federal da cultura. Quel promova en tut la Svizra la plurilinguitad e la chapientscha tranter las cuminanzas linguisticas cun 15 milliuns francs. 5,5 milliuns èn ids l'onn 2021 al chantun Grischun per sustegnair il talian ed il rumantsch sco lingua naziunala.
Era auters chantuns duain avair la pussaivladad da promover il rumantsch
La controlla da finanzas remartga en il rapport la situaziun da las rumantschas e dals rumantschs. Cun quai che dus terzs da las persunas da lingua rumantscha n’abitan betg en territori rumantsch e la mesadad da quellas vivan perfin ordvart il chantun Grischun, propona il rapport che l'Uffizi federal da cultura duai examinar la pussibilitad d'ina basa legala per ch'era auters chantuns pon far la dumonda per subvenziuns a la Confederaziun per sustegnair il rumantsch. L'Uffizi federal da cultura conferma envers RTR ch'ina tala proposta è en lavur e vegn tut tenor tramessa bainbaud en consultaziun cun la proxima missiva da cultura.