Siglir tar il cuntegn
cuntegn

Svizra Controlla da finanzas vul sminuir subvenziuns

La Confederaziun duai sminuir las subvenziuns per l'agricultura. La controlla da finanzas federala recumonda a la Confederaziun tar quai pass – tranter auter pervi dal artitgel constituziunal davart la segirtad alimentara.

massa vaccas grischas.
Legenda: L'artitgel davart l'agricultura e quel davart segirezza alimentara sajan equivalent, argumentescha la Confederaziun. Keystone

Dapi la fin settember 2017 saja l'artitgel constituziunal per la segirtad alimentara en vigur. Quel era vegnì approvà sco cuntraproposta d'ina iniziativa dal pievel da l'uniun dals purs. Realisà na saja quel dentant anc betg vegnì, scriva la controlla da finanzas. Tenor quel duessan products agrars e proceduras da producziun che n'èn betg persistentas vegnir promovidas main fitg u insumma betg. Quai pertutgia per exempel products che sajan avisads ferm sin imports. Tenor la controlla da finanzas duai quai avair consequenzas sin las subvenziuns.

Concret vai per sustegnair la producziun da charn. Quella saja per part dependenta da imports da pavel, argumentescha la controlla da finanzas. Tenor lezza possian ins spargnar subvenziuns tar la tratga d'animals, producziun da muvel e controllas da maz. Concretas cifras na datti dentant betg.

Examinaziun singula

L'uffizi federal d'agricultura refusa las reproschas ed argumentescha che mintga artitgel en la Constituziun saja equivalent: pia n'haja il nov artitgel constituziunal (104a davart la segirezza alimentara) nagina prioritad visavi auters artitgels, sco per exempel visavi l'artitgel d'agricultura 104. Perquai dovria mintga giada in'examinaziun singula.

RR novitads 11:00