Suenter 17 rundas da tractativas è la Svizra sa cunvegnida cun l'Indonesia davart ina convenziun da commerzi liber cun l'Indonesia. Quella duai vegnir suttascritta anc avant la fin da l'onn. Tenor il departament d'economia sa tractia dad in mument decisiv da la politica da commerzi svizra. Sco gia tar la cunvegna cun la China, haja la Svizra pudì realisar ina cunvegna cun in grond stadi partenari avant l'Uniun europeica.
L'Indonesia è quai che reguarda la populaziun in dals pli gronds pajais dal mund ed uschia in grond martgà. Sco Schneider-Ammann ha declerà envers SRF sa legria el da la cunvegna. En l'Indonesia dettia 260 milliuns consuments, 40 milliuns da quels sajan da la classa mesauna e quels veglian cumprar products da qualitad dal vest.
Grazia a la convenziun duain a media vista ils dazis sin quasi tut ils exports svizzers en l'Indonesia scrudar. Discussiuns avevan l'ultim anc ils exports d'ieli da palmas da l'Indonesia chaschunà. Tenor il departament d'economia èn ils dus pajas sa cunvegnids sin rabats da dazis sin ieli da palma en l'autezza da 20 fin 40%. Uschia na saja periclitada la producziun d'ieli indigen, hai num en ina communicaziun.
RR novitads 12:00