Legenda:
La Swiss sto spargnar ed è en discussiun cun il sindicat dad ubain reducir pajas ubain reducir plazzas.
Keystone
La societad aviatica Swiss sto reducir custs en consequenza da la pandemia da corona. I giaja per respargns da radund 20%. Quai prevesa la Swiss da far ubain cun reducir pajas, ubain cun reducir plazzas. Actualmain marschan tenor la «SonntagsZeitung» las tractativas tranter la Swiss ed il sindicat VPOD. En tut èn periclitadas 1425 plazzas da 9’500 emploiads - quai è 15%.
I haja gia dà discurs cun sindicats e represchentants dal persunal davart in plan social e singuls puncts dal contract collectiv da lavur. Tenor il pledader Markus Lipp na vul la «Swiss» dentant betg spargnar sulet tar il persunal, mabain en tut ils secturs dal concern.