Siglir tar il cuntegn

Header

Cusseglier federal Alain Berset
Legenda: Keystone
cuntegn

Corona Leaks Berset haja sincerà d'avair savì nagut declera il Cussegl federal

Il Cussegl federal ha discussiunà ils rapports d’indiscreziun en connex cun las decisiuns durant il temp da la pandemia da corona. Il pledader dal Cussegl federal, vicechancelier André Simonazzi, ha prelegì ina decleraziun en la quala il Cussegl federal suttastritga ch’in clima da fidanza intern sco er extern è necessari per la qualitad da sias decisiuns. Indiscreziuns donnegian la lavur en il gremi, la credibladad dal collegi ed ils interess dal pajais. Il Cussegl federal tolereschia naginas indiscreziuns e crititgeschia ferm quellas.

audio
Analisa: Cussegl federal sustegn Berset cun resalva
ord Actualitad dals 25.01.2023. Maletg: Keystone
laschar ir. Durada: 5 minutas 40 Secundas.

Il president da la Confederaziun Alain Berset saja s’abstegnì per ina part da la discussiun. Suenter che la vicepresidenta Viola Amherd haja orientà Berset davart il cuntegn da quest discurs, haja l’entir Cussegl federal cuntinuà da discussiun, uschia Simonazzi.

Cunfidanza saja restablida

Sa basond sin ils indizis dal president da la Confederaziun, che haja garantì da n'avair betg gì enconuschientscha da las indiscreziuns, vul il Cussegl federal cuntinuar cun las fatschentas sin basa da la fidanza reconstruida. El haja prendì enconuschientscha da l’avertura da l'examinaziun tras las cumissiuns da gestiun dal parlament e giavischia che quella vegnia manada tras bainspert. Quai en l‘interess da la fidanza necessaria en l’instituziun.

Gruppa da lavur examinescha fatgs

Ier han las cumissiuns da gestiun (GPK) da omadus chombras dal Parlament federal decidì d'examinar la surdada d'infurmaziuns confidenzialas a la pressa dal departament da cusseglier federal Alain Berset. I va per infurmaziuns confidenzialas ch'èn vegnidas tramessas vinavant a la las gasettas da Ringier dal Departament federal da l'intern.

audio
Indiscreziuns durant corona: GPKs cumenzan cun la lavur
ord Actualitad dals 24.01.2023. Maletg: Keystone
laschar ir. Durada: 5 minutas 35 Secundas.

Tge rolla ha Alain Berset giugà?

Las cumissiuns han discutà durant dus dis tgenins aspects dal cas ch'ellas pudessan examinar cun resguardar la separaziun da las pussanzas. Cusseglier dals chantuns Matthias Michel (PLD/ ZG) ha declerà en la conferenza da pressa che la finamira da las GPKs saja da sclerir tgi ch'haja chaschuna las indiscreziuns e tge rolla che cusseglier federal Alain Berset haja giugà. Vinavant veglian las cumissiuns sclerir sche tut il Cussegl federal haja fatg avunda per impedir indiscreziuns. Las GPKs vulan er recumandar mesiras per impedir talas indiscreziuns en l'avegnir.

Squitsch resta

Per il president da la Confederaziun Alain Berset muntia la decisiun da las cumissiuns da gestiun ch'el restia vinavant en il focus, di Adrian Camartin, il correspundent da RTR en Chasa federala. La gruppa da lavur vegni era a prender sut la marella ses agir. Quai saja la dimensiun giuridica, mo i dettia era la dimensiun politica da l’affera. E qua stoppia Alain Berset quintar cun ulteriuras rinfatschas e pretensiuns dals adversaris politics ch’el duaja demissiunar.

RTR novitads 17:30

Artitgels legids il pli savens

Scrollar a sanestra Scrollar a dretga