56% da la populaziun en Svizra vul segiramain u plitost sa laschar vaccinar cunter il coronavirus. Quai resulta d'ina retschertga ch'il "Blick ha fatg. Il pli critic envers la virola sajan las persunas en la Svizra franzosa ed ils giuvens.
Prontadad da sa laschar vaccinar crescha cun la vegliadetgna
Da las persunas tranter 18 e 34 onns vulan be 48% segiramain u plitost sa laschar vaccinar. Tar las persunas tranter 35 e 50 onns han 55% inditgà da segiramain u plitost sa laschar vaccinar. Tar las persunas tranter 51 e 79 onns èn 73% cler prontas da sa laschar vaccinar. En la Svizra franzosa vulan be 23% sa laschar vaccinar, en il Tessin 41% ed en la Svizra tudestga 43%.
Per la retschertga ha la gasetta dumandà l'entschatta dal mais 1'172 persunas. La mesadad dals dumandads dubita da pudair manar ina vita normala fin l'atun.
Stan da vaccinar
Adina dapli persunas en Svizra vegnan vaccinadas cunter Covid-19. Il tempo è dentant different da chantun a chantun.
Acceptanza da sa laschar vaccinar crescha en tut il mund
En tut il mund crescha la fidanza en las vaccinaziuns cunter corona cumpareglià cun la fin da l’onn passà. Quai demussa ina retschertga dal Forum mundial d’economia.
En l’Europa sajan quai cunzunt ils Tudestgs e Talians che veglian sa laschar vaccinar. En omadus pajais veglian passa 70% da la populaziun sa laschar vaccinar. Anc pli grond è il giavisch da sa laschar vaccinar en l’America Latina, numnadamain en la Brasilia cun 80%. Il pli bass saja l’acceptanza en Russia cun bun 40%. Il WEF ha dumandà la fin da favrer passa 13'000 persunas da 15 pajais.
