Il dumber da las novas infecziuns è creschì las ultimas 24 uras per 70 en Svizra ed il Principadi da Liechtenstein. Quai èn 27 damain che ier sonda, sco l'Uffizi federal da la sanadad ha communitgà. Il dumber da las persunas ch'èn mortas pervi dal virus è restà tar 1686.
WHO annunzia nov record
Il dumber global da las novas infecziuns cun il coronavirus aifer in di ha cuntanschì ier sonda in nov record. Cun passa 212'000 cas aifer 24 uras saja il dumber uschè aut sco anc mai. Quai annunzia l'Organisaziun mundiala da la sanadad WHO.
Passa la mesadad dals cas sajan vegnids registrads en l’America dal Sid e l'America dal Nord. Cunzunt ils Stadis Unids e la Brasilia èn ferm pertutgads da la pandemia. En l'entir mund è fin uss passa in mez milliun umans morts pervi da Covid-19.
Mintga 9 minutas in mortori en l'Iran
L’Iran ha registrà il pli aut dumber da morts da corona dapi l’entschatta da la pandemia. Aifer 24 uras sajan 163 persunas mortas pervi dal virus, quai ha communitgà il ministeri da sanadad a Teheran. Quai è in mortori mintga 9 minutas.
Il president, Hassan Rohani, aveva ordinà in obligatori da mascras tar autoritads ed en il traffic regiunal public. Experts ed il ministeri da sanadad iranais èn per mesiras pli severas per evitar anc dapli infecziuns. Ma il president Rohani na vul betg quai.
Ord l'archiv
La SwissCovid duai avisar sch’ins ha gì contact cun ina persuna che ha il coronaviurs.
