Raschun per midar la valaivladad dal certificat saja stà per adattar quella al palc europeic. Damai ch'ins na dovra betg pli il certificat entaifer la Svizra, n'haja quai naginas consequenzas directas per persunas guaridas. En pajais che renconuschian il certificat svizzer, saja quel tuttina valaivel be 180 dis.
Plinavant ha il Cussegl federal decidì da simplifitgar las regulaziuns da vegnir en Svizra per persunas ordaifer la zona da Schengen. Quai er en accordanza cun las regulaziuns europeicas. Quest pass hajan ins decidì da far, pervi da la varianta omicron pli pauc privlusa, scriva il Cussegl federal.
Per persunas guaridas da terzs stadis, sco ils Stadis Unids, la Serbia e l'India, èsi puspè pussaivel da vegnir en Svizra per vacanzas, senza duvrar ina lubientscha. Quai tranter auter per turists. Tenor la lescha che vala uss, è quai be pussibel per persunas viroladas.