Siglir tar il cuntegn

Header

cuntegn

Coronavirus Cunzunt persunas immigradas èn en ospitals pervi da Covid-19

Blers da quest immigrants ed immigrantas sajan gist turnadas da las vacanzas ord lur pajais d’origin. Vitiers sajan questas persunas bass qualifitgadas e mal infurmadas. Quai rapporta la «NZZ am Sonntag» che sa referescha ad indicaziuns da medis e da politichers.

Tant sco el audia dals ospitals saja quai in problem, citescha la gasetta il president dals directurs chantunals da sanadad, Lukas Engelberger.

Per part haja questa situaziun era da far cun barrieras linguisticas. Per cuntanscher meglier la gruppa d’immigrants ed immigrantas, veglian ils chantuns rinforzar la campagna da vaccinaziun cun flyers, via Whatsapp e tras uniuns.

Forsa era pass pli rigurus

Eventualmain saja da ponderar seriusamain da puspè introducir la quarantina d’entrada en il pajais, ha agiuntà il president dals directurs chantunals da sanadad, Lukas Engelberger. Quai per evitar ch’ils ospitals vegnian surchargiads cun pazients da Covid-19. Era diversas associaziuns da l’economia sajan vi da studegiar il mument, co ellas pudessian gidar d’augmentar la quota da vaccinaziun.

L’emna proxima è planisà in inscunter cun il minister da sanadad Alain Berset – per discutar las pussaivladads da franar la derasaziun dal virus. L’entschatta d’avust eran 23 persunas sin las staziuns intensivas pervi da Covid-19. Uss è quest dumber s’augmentà sin passa 160 – sis da quellas en il Grischun.

audio
Per tadlar curt e cumpact
01:23 min, RTR Audio dals 22.08.2021.
laschar ir. Durada: 01:23 minutas.

RTR novitads 12:00

Artitgels legids il pli savens

Scrollar a sanestra Scrollar a dretga