Dapli mesiras da corona, sco era damain – per omaduas vias na vesa Lukas Engelberger actualmain nagina raschun, malgrà dapli cas. I saja pussaivel che la Svizra saja a l'entschatta d'ina quarta unda.
La situaziun actuala en ils ospitals en Svizra n'è betg alarmanta.
I dovria dentant vinavant mesiras da protecziun, ha ditg il president da la Conferenza da las directuras e dals directurs chantunals da sanadad, en in'intervista cun las gasettas da Tamedia. In nov lockdown saja in scenari pauc realistic, damai ch'ins haja vaccins , ha manegià Engelberger. Cun vaccinar haja mintgin e mintgina la pussaivladad d'evitar mesiras pli severas. Ins stoppia dentant rinforzar la campagna da vaccinar. El parta dal fatg, che blers han spustà il termin da vaccinar suenter las vacanzas, ma els vegnian a sa laschar vaccinar l'avust. Cun la vaccinaziun haja mintgin sez en maun dad evitar ulteriuras mesiras.
Ord l'archiv
Baud u tard ston tuts decider, sche virolar cunter corona u betg. Las opiniuns èn divididas, e quai betg mo tar las persunas da ristg, quai era tar il persunal da tgira. Federico Belotti, redactur da RTR, ha discurrì cun duas tgirunzas. Ina vul, e l'autra na vul betg la virola – el ha vulì savair ils arguments.
