La sonda ha l’Uffizi federal da sanadad annunzià 182 novs cas da corona aifer in di per la Svizra ed il Principadi da Liechtenstein. Questa cifra è sur la media dals davos set dis. Il venderdi aveva il BAG communitgà 161 cas novs, la mesemna e la gievgia mintgamai 181.
En tut èn uschia vegnidas confermadas dapi l'entschatta da la pandemia 36'451 infecziuns. Cumpareglià cun il venderdi han 7 persunas dapli stuì vegnir ospitalisadas pervi da Covid-19. Il dumber da mortoris en connex cun coronavirus è restà sco il di avant tar 1712.
2 novs cas en Grischun
Il chantun Grischun ha annunzià la sonda dus novs cas da corona. Actualmain èn 49 persunas en quarantina en il Grischun e 20 en isolaziun – ina persuna vegn tgirada en l'ospital. Aifer l'ultima emna han ins registrà en Grischun 16 infecziuns cun il coronavirus.
