Intgins ospitals hajan perquai cumenzà da spustar operaziuns che na sajan betg urgentas. Quai scriva la “NZZ”. Sco exempel numna la gasetta l’ospital universitar da Turitg e l’ospital chantunal ad Aarau. L’Inselspital a Berna n’haja sin dumonda anc betg prendì talas mesiras – scriva la “NZZ” vinavant. Er l'Ospital chantunal a Cuira ha reagì sin l'augment dals cas da corona e puspè avert la staziun da pandemia.
Ospital chantunal a Cuira avra intensiva
La mesemna aveva l'ospital chantunal a Cuira annunzià ch'el avria puspè la staziun da pandemia. Tut ils 10 letgs sin la staziun intensiva regulara sajan occupads. La staziun da pandemia era pir vegnida serrada l'entschatta fanadur – uss saja ella puspè vegnida averta. En cumparegliaziun: l'onn passà era quella pir puspè vegnida averta l'october.
