Siglir tar il cuntegn

Header

audio
Quai pudess il Cussegl federal decider quest suentermezdi
Or da Actualitad dals 26.05.2021.
laschar ir. Durada: 04:39 minutas.
cuntegn

Coronavirus Oz datti novas decisiuns – ina survista

Puspè ir ad in concert cun pli che 100 persunas u mangiar ina pizza en il restaurant. Quai pudess esser pussaivel davent da glindesdi. Las premissas èn bunas ch'il Cussegl federal schlucca oz tenor il plan ch’el ha tramess en consultaziun avant duas emnas.

Tant sco la gastronomia brama da puspè pudair beneventar giasts era endadens braman chantaduras e musicists da puspè pudair trenar e preschentar lur ovras a dapli che 100 persunas. Quai mo intginas da las schluccadas che pudessan vegnir decididas. Qua ina survista da tuttas:

Las schluccadas davart las qualas i vegn decidì oz:

  • Ustarias duain puspè avrir er dadens
  • Occurrenzas dadens cun fin 100 persunas, dadora cun fin 300 persunas
  • Nagin obligatori da homeoffice per firmas che fan regularmain tests
  • Sport e cultura d’amaturs po vegnir fatg cun fin 30 persunas
  • Instrucziun da preschientscha tar scolas autas vegn schlargiada sin 50 persunas
  • Indrizs da wellness e bogns termals pon avrir
  • Persunas vaccinadas na ston betg pli ir en quarantina

Bunas premissas

La situaziun enturn il coronavirus sa calma dapi intginas emnas en Svizra. Dasper la cifra d'infecziuns che sa sbassa, datti era pli paucs mortoris ed adina dapli persunas ch'èn vaccinadas. Sin basa da questa situaziun pudess il glindesdi ir en vigur la segunda fasa – la fasa da stabilisaziun che permetta ulteriuras schluccadas.

Model da trais fasas

Avrir la boxSerrar la box

Il Cussegl federal lavura tenor in model da trais fasas:

  1. fasa da protecziun
  2. fasa da stabilisaziun
  3. fasa da normalisaziun

Per il mument sa chatta la Svizra en la fasa da protecziun. Quella vala enfin che tut las persunas da ristg che vulan laschar vaccinar han gì questa pussaivladad. Tenor il Cussegl federal è quai la fin da quest mais. Lura suonda la fasa da stabilisaziun. En questa fasa duai dar dapli schluccadas. Quella fasa dura enfin che tut las persunas creschidas che vulan sa laschar vaccinar han pudì far quai. Silsuenter suonda la fasa da normalisaziun. En quella duain tut las mesiras encunter il coronavirus pudair vegnir abolidas.

Da tge uras ch'il Cussegl federal preschenta las decisiuns definitivas n'è anc betg enconuschent. Sin RTR.ch pudais vus persequitar live la conferenza da pressa.

RTR actualitad 12:00

Artitgels legids il pli savens

Scrollar a sanestra Scrollar a dretga