Siglir tar il cuntegn

Header

cuntegn

Coronavirus: Point de presse 58% da la populaziun svizra è vaccinada cumplainamain

Malgrà ils dumbers creschents è il tempo da vaccinar en Svizra anc adina memia plaun. Cumpareglià cun l'exteriur è la Svizra en retard. Tenor Virginie Masserey, manadra da la secziun controlla d'infecziuns tar il BAG, sajan 58% da tuttas persunas vaccinadas cumplainamain. Quai saja anc adina memia pauc per pudair cuntanscher fin l'enviern ina immunisaziun sufficienta. Masserey ha danovamain fatg reclama per la vaccinaziun.

Berger: «Vaccinaziun da rinfrestg ad interim betg necessari»

Fin ussa sajan persunas cun in vaccin da mNRA protegias bain, declera Christoph Berger. Pequai na saja ina vaccinaziun da rinfrestg actualmain anc betg necessaria. Ins vegnia ad observar la situaziun fitg attent e sche necessari vegnia ins a dar a temp ina recumandaziun per ina uschènumnada vaccinaziun da «Booster».

video
Christoph Berger: «Vaccinaziun da rinfrestg ad interim betg necessari»
Or da News-Clip dals 29.09.2021.
laschar ir

150'000 dosas Johnson&Johnson

La Confederaziun cumpra 150'000 dosas dal vaccin cunter Corona da l'interpresa Johnson&Johnson. Il med vegnia furnì anc quest'emna en Svizra e repartgì l'emna proxima als chantuns, scriva l'Uffizi federal da sanadad BAG.

Quest vaccin che sa basa sin vecturs po vegnir sprizzà a persunas che na pon ord motivs medicinals betg vegnir vaccinadas cun in vaccin da mRNA sco quel da Pfizer/Biontech u Moderna. Dal vaccin Johnson&Johnson dovri be ina vaccinaziun. Tenor Confederaziun porscha el ina fitg buna protecziun: en media 66,9% cunter privel d'infecziun ed 85% da vegnir malsaun grev.

video
Virginie Masserey davart il vaccin da Johnson&Johnson
Or da News-Clip dals 29.09.2021.
laschar ir

Masserey: «Tut ils indicaturs mussan engiu»

Tut ils indicaturs en Svizra mussian envers engiu, sco dapertut en l'Europa, auter ch'en la Gronda Britannia. Be en la Svizra Interna gajan las cifras ensi. Era adina damain persunas stoppian ir en l'ospital. La grond part sajan persunas pli giuvnas che na sajan betg viroladas.

video
Virginie Masserey: «Tut ils indicaturs mussan engiu»
Or da News-Clip dals 29.09.2021.
laschar ir

Cifras actualas

Aifer las ultimas 24 uras hai dà en Svizra 1'451 novas infecziuns da corona. Vitiers ha il BAG registrà set novs mortoris e 39 entradas en l'ospital. Il Grischun noda 32 novas infecziuns, nagins novs mortoris ed er il dumber da persunas en l'ospital n'è betg sa midà. Dapi l'entschatta da la pandemia èn fin uss mortas en il chantun Grischun 196 persunas.

RTR novitads 15:00

Artitgels legids il pli savens

Scrollar a sanestra Scrollar a dretga