Perquai che las reservas da sang èn en Svizra sin in nivel critic, appellescha il servetsch a la populaziun da dar sang. Cunquai che las novas infecziuns da corona s'augmentian ferm, sajan ils ultims dus mais vegnian memia paucas persunas a dar sang. Il medem mument dovrian ils ospitals actualmain bleras conservas. Quai ha communitgà la Donaziun da sang Svizra.
Var 150 donaziuns per emna mancan
Era cun spustar operaziuns sajan unfrendas d'accidents e pazients da cancer visadas vi sin sang. Sin basa dal nivel bass da dar sang manchian actualmain var 150 donaziuns per emnas. Per dar sang na stoppian ins betg avair in certificat da Covid. Suenter ina vaccinaziun possian ins gia 48 uras pli tard dar sang, permess ch'ins n'haja nagins sintoms. Dar sang po mintga persuna tranter 18 e 60 onns che sa senta saun e paisa almain 50 kilos.
En il Grischun anc betg stgars, ma plaunsieu al cunfin
Era il servetsch per donaziuns da sang da la Crusch Cotschna en il Grischun tschertga sang. Anc na saja la situaziun betg critica, ed ins quinta da pudair cumplettar las reservas. Era qua sentan ils responsabels che las donaziuns regularas cumenzan a mancar, perquai che bleras persunas ston star a chasa.
