Siglir tar il cuntegn

Header

cuntegn

Coronavirus Sintoms da long-Covid dapli tar persunas pertutgadas da corona

Problems neuralgics e corporals durabels ch’èn tipics per la malsogna long-Covid, èn da chattar cleramain pli savens tar persunas ch’èn vegnidas testadas positiv sin il coronavirus che tar persunas che n’èn betg vegnidas en contact cun il virus. Quai mussa in studi da l’universitad da Basilea.

Tenor ils auturs dal studi mussia quai che betg il stress e las mesiras da protecziun en connex cun la pandemia procurian per ils sintoms da long-Covid, mabain cun gronda probabilitad l’infecziun cun il coronavirus.

Tar las persunas ch’èn sa participadas al studi e tar las qualas l’infecziun è succedida avant almain nov mais, hajan ins observà las pli grondas differenzas tar la gruppa da controlla senz’infecziun. Cunzunt quai che pertutgava la perdita dal fried e dal gust, sco era la tendenza d’esser pli spert stanchel e d’avair fevra. Era dolurs muscularas, problems da la respiraziun sco era problems da sa concentrar e da la memoria hajan els observà pli savens tar las persunas che han fatg tras in'infecziun cun il coronavirus.

Situaziun da l'atun passà

Per il studi fatg il november 2021 han ils auturs e las auturas dumandà passa 11’000 persunas da l’entira Svizra. Radund 1’500 participants e participantas eran s’infectadas cun il coronavirus, var 750 gia nov mais u pli ditg avant l’enquista. La gruppa da controlla da las persunas anc mai testadas positiv, ha cumpiglià radund 9’500 persunas.

Tar in sumegliant studi da l’ospital universitar e da l’universitad da Genevra, publitgà avant curt – avevi dà il medem resultat.

audio
Per tadlar curt e cumpact
ord RTR Audio dals 23.03.2022.
laschar ir. Durada: 1 minuta 17 Secundas.

RTR novitads 18:00

Artitgels legids il pli savens

Scrollar a sanestra Scrollar a dretga