Siglir tar il cuntegn

Header

cuntegn

Corrupziun ABB accepta accumodaments e paja 431 milliuns dollars

La filiala dal concern d'industria svizzer en l'Africa dal Sid ha pajà 1,3 milliuns francs per pudair far fatschentas en il volumen da 200 milliuns francs. Tar ils process en Svizra, ils Stadis Unids e l'Africa dal Sid ha ABB uss acceptà accumodaments.

Betg mo far ina buna offerta leva l'ABB per il pli grond producent d'electricitad da l'Africa dal Sid Escom. La Procura publica federala da la Svizra tschantscha d'in schema da corrupziun che collavuraturs da l'ABB han construì. Quai cun la finamira da survegnir incumbensas en connex cun la construcziun dad in'ovra da charvun.

Daners per managers per survegnir incumbensas

Cun daners da corrupziun da 1,3 milliuns francs ha l'ABB survegnì incumbensas en il volumen da 200 milliuns dollars. L'ABB vegn chastiada da la Svizra cun 4 milliuns francs, ella na haja betg prendì tuttas mesiras d'evitar corrupziun.

Ovra da chavrun en la provinza Mpumalanga en l'Africa dal Sid.
Legenda: Ovra da chavrun en la provinza Mpumalanga en l'Africa dal Sid. Reuters

Il venderdi ha l'ABB er acceptà in accumodament cun las autoritads americanas. ABB paja en tut 315 milliuns dollars als Stadis Undis, l'Africa dal Sid, la Svizra e la Germania per reglar las renfatschas da corrupziun. L'ABB haja tenor SRF gia pajà ina cumpensaziun da 104 milliuns francs ad Escom en l'Africa dal Sid. Cun quai ha l'ABB pajà en tut 431 milliuns francs en quai cas da corrupziun.

L'ABB ha gia mess enavos 325 milliuns dollars durant il terz quartal 2022 per pajar tuttas multas en connex cun il scandal da corrupziun. L'ABB ha prendì posiziun e ditg che quai saja uss ina cunvegna cumpletta e finala cun las autoritads svizras.

RTR novitads 11:00

Artitgels legids il pli savens

Scrollar a sanestra Scrollar a dretga