Surtut il cumbat encunter la corrupziun tar las fatschentas d'export saja sco gia avant dus onns «dischillusiunant». Suenter passa 20 onns convenziun encunter la corrupziun da l'Organisaziun da cooperaziun e svilup economic OECD, saja l'economia mundiala lunsch davent dad esser libra da corrupziun.
Sin buna via tar cumbat encunter corrupziun
En la cumparegliaziun internaziunala fa la Svizra però ina buna figura. Dals 47 pajais ch'èn vegnids examinads sa chatta la Svizra sin plazza trais davos ils Stadis Unids e la Gronda Britannia. Ma la Svizra haja anc adina pensums da schliar.
Vitiers tutgia er che whistleblowers che scuvran malgistadads tar interpresas ed administraziuns, vegnian protegids meglier. Il champ d'applicaziun tar la lescha davart la lavada da daners saja memia stretg. Er vegnir cumpigliads stoppian advocatas ed advocats, en spezial sche quels fundeschan ed administreschian societads da domicil.
Revisiun vid far naufragi en parlament
Ina restricziun da la lescha è il mument sin buna via da far naufragi en il parlament. Il Cussegl dals chantuns aveva stritgà las fixaziuns per advocatas ed advocats or da la proposta. La cumissiun da dretg dal Cussegl naziunal è uss encunter la revisiun, perquai ch'ella saja flaivlentada talmain.
Ord l'archiv:
Il 2012 ha il Minisguard declerà als uffants tge ch'in whistleblower è e tge che quels dastgan u apunta betg, qua tar l'exempel da la banca.
