En Svizra èn entant passa 3 milliuns persunas vaccinadas cumplettamain encunter corona. Quai èn 36% da la populaziun. Ulteriurs 15% han entant survegnì l'emprima dosa (prest 1,3 milliuns persunas). Il dumber da las novas infecziuns è restà sin in nivel constant bass. Venderdi ha il BAG annunzià 158 novs cas. Cumpareglià cun l'emna passada, è la cadenza da vaccinar ida enavos per 12%.
Tenor Swissmedic è il medem temp però er creschì il dumber d'annunzias da persunas, ch'han gì effects secundars. Cumpareglià cun avant duas emnas, hai dà 500 annunzias dapli cun 3'500. La gronda part u prest 68% dals pertutgads èn dunnas. E surtut persunas ch'han survegnì il vaccin da Moderna, sa lamentan d'effects secundars. Tar la gronda part u tar passa 60% sa tracti tenor Swissmedic però d'effects secundars betg gravants.
