- La patangada en il Glattpark ad Opfikon è stada tranter duas gruppas da persunas da l'Eritrea.
- 12 persunas èn vegnidas blessadas ed han stuì vegnir transportadas en l'ospital.
Ad Opfikon datiers da Turitg hai dà durant in'occurrenza da persunas da l'Eritrea ina patangada. L'emprim aveva «20 Minuten» rapportà. Pli tard ha il pledader da medias da la Polizia chantunala da Turitg confermà sin dumonda da l'agentura da novitads Keystone-SDA l'acziun gronda da la polizia, davent da las sis la saira.
Cumenzà hai cun charplinas tranter duas gruppas da persunas da l'Eritrea. A la polizia saja lura gartegià da separar las gruppas, e da schliar l'occurrenza. Set persunas sajan grev blessadas, tschintg persunas hajan blessuras levas – ha inditgà il pledader da la polizia.
Ils involvids da las charplinas èn stads participants dal Festival d'Eritrea. Quest'occurrenza avess duì avair lieu la sonda ad Oberuzwil en il chantun Son Gagl. Pervi da tema d'excess da violenza han ils organisaturs dentant desditg a curta vista il festival. Tenor la polizia è ina part dals participants sinaquai viagiads da là ad Opfikon.