Concret veglia la Finma, sco era autras autoritads da surveglianza, pudair dar chastis, ha ditg Marlene Amstad a la conferenza da medias a Berna. Ils eveniments enturn la Credit Suisse hajan mussà ch'ils instruments da la Finma vegnian a lur cunfins en cas extrems.
En pli ha la Finma defendì la surpigliada sfurzada sco la meglra schliaziun. La Credit Suisse occupeschia l’autoritad da surveglianza gia daditg, ha suttastritgà la presidenta dal cussegl d’administraziun Marlene Amstad. La situaziun saja daventada pli critica l’ultim quartal da l’onn passà, suenter che clients hajan retratg 138 milliardas francs da la banca en crisa. La finala saja la situaziun escalada il mars, cura che duas bancas regiunalas hajan fatg concurs en ils Stadis Unids. Concurs e sanaziun da la CS avessan pudì chaschunar ina crisa da finanzas globala, ha Amstad argumentà plinavant.
