Siglir tar il cuntegn

Svizra Credit Suisse noda cifras cotschnas

En l'emprim quartal dal 2016 ha la banca gronda svizra nudà ina perdita netta da 302 milliuns francs.

logo da la Credit Suisse
Legenda: La segund gronda banca svizra noda per la segunda giada en roda in deficit. Keystone

L’onn passà aveva la segund gronda banca svizra anc nudà in gudogn da passa 1 milliarda francs. En l'emprim quartal 2016 ha sulettamain la sparta d'administraziun da facultad en l'exteriur fatg gudogn.

Ils experts analists avevan prognostitgà ina perdita da 474 milliuns francs. Il schef da la Credit Suisse, Tidjane Thiam, ha avertì ch’era en il segund quartal 2016 pudessi cuntinuar cun quest trend negativ.

Il deficit en l'emprim quartal è gia il segund en roda. L'ultim quartal dal 2015 aveval la banca gia nudà ina sperdita da 5,8 milliardas francs. Quai pervi da restructuraziuns e cuntraversas giuridicas.

Gia il schaner aveva la banca annunzià da vulair stritgar plazzas, uschia sajan fin oz 3500 plazzas vegnidas stritgadas, communitgescha la CS quai sajan 58% da la finamira da 4000 fin 6000 plazzas fin la fin 2016.

RR novitads 08:00