Siglir tar il cuntegn

Header

cuntegn

Svizra Credit Suisse po ir en l'Arabia Saudita

La banca ha survegnì la licenza da banca per l'Arabia Saudita. Quai ha communitgà il minister da finanzas arab. La CS era sa stentada gia daditg per la licenza cumplaina.

Pervi da las agitaziun en connex cun il mazzament dal schurnalist Jamal Khasoggi aveva il CEO Tidjane Thiam dentant ditg giu l'atun passà la conferenza d'investiders.

Cun schlantsch en il 2019

Il gudogn net da la Credit Suisse è creschì per stgars 8% cumpareglià cun l’emprim quartal da l’onn passà. La Credit Suisse, il numer dus sin il martgà bancar svizzer, ha fatg tranter il schaner ed il mars in gudogn net da 749 milliuns francs. Il gudogn net saja creschì cunzunt tras bunas fatschentas en l’administraziun da facultad, fa a savair la banca en ina communicaziun a las medias.

Success per la dieschavla giada en seria

Quai saja la dieschavla giada en seria ch’il gudogn net saja pli aut ch’en la perioda congualabla da l’onn avant, scriva la CS vinavant. Quai mussia che sia maschaida d’affars sa cumprovia er sch’il martgà saja difficil.

Il resultat saja cleramain pli aut che prevesì dals analists, scriva l’agentura da novitads svizra SDA. Quels avevan fatg quint cun in gudogn net da 694 milliuns francs.

CS administrescha 1’431’000’000’000 francs

La fin da mars 2019 administrava la CS 1’431 milliardas francs. La fin da mars da l’onn avant eran quai anc 84 milliardas pli pauc, numnadamain 1’347 milliardas.

Svizra – il numer 1 sin il mund

Avrir la box Serrar la box

La Svizra saja insumma il numer 1 dal mund a reguard il private banking che va sur cunfin, scriva l’organisaziun da bankiers Swiss Banking sin sia pagina en la rait: Uschia administreschian las bancas svizras 27.5% da quels raps. L'onn 2017 eran quai en cifras 7’291,8 milliardas francs.

RR novitads 08:00

Artitgels legids il pli savens