Tar differents corps da polizia en Svizra èn vegnidas annunziadas las emnas passadas blers cas da faussas plazzas da lavur. Las persunas pertutgadas hajan survegnì via Whatsapp u Telegram offertas da plazzas ed empermischuns da pajas extraordinarias. Las incumbensas èn per exempel valitar products online, cumprar products u testar applicaziuns electronicas.
Per survegnir las plazzas, hajan las persunas dentant stuì pajar ordavant ina summa. In pledader da la Polizia chantunala da Berna ha ditg che cugliunaders hajan gudagnà sin questa via radund 235'000 francs cun tschintg cugliunarias. Ins quinta dentant cun in grond dumber zuppà.
