Il mardi èn sis burgais talians vegnids arrestads entras la polizia – dus en il chantun Grischun. L'Italia aveva tschentà a la Svizra ina dumonda d'extradiziun per ils arrestads. Las autoritads talianas renfatschan als arrestads differents delicts en l'Italia, dentant er en Svizra. Tant ils chantuns, sco er la Polizia criminala federala e la Procura publica federala èn stads involvids. En pli hai er dà pliras perquisiziun da chasas en il Tessin.
Ils sis Talians duain vegnir interrogads uschè svelt sco pussibel areguard la dumonda d'extradiziun. Sch'ils arrestads èn d'accord cun l'extradiziun po la procedura vegnir simplifitgada. L'Uffizi federal da giustia pudess alura confermar immediat l'extradiziun a l'Italia.
Plirs arrests en l'Italia
Er en l'Italia èn plirs commembers da la mafia vegnids arrestads tar ina razzia coordinada. Tenor las autoritads sa tracti da passa 100 commembers da la 'Ndrangheta, ina gruppaziun da la mafia, cun sedia en la Calabria. La 'Ndrangheta vala sco in dals gronds acturs en il commerzi da drogas internaziunal. Tar las razzias a Reggio Calabria, Milaun, Firenza e Livorno hajan ins chattà var ina tonna cocain or da l'America dal Sid.
Als arrestads vegn renfatschà, sumegliant als arrestads en Svizra, criminalitad organisada, possess d'armas, extorsiun, commerzi cun drogas e corrupziun.
