Manaders da chasas d'attempads e da tgira crititgeschan fermamain las autoritads svizras. En la crisa da corona sajan lur chasas sa sentidas ignoradas, e per part perfin schicanadas, hai num en ina retschertga da las gasettas da Tamedia.
Strategia da testar manglusa
Tut en tut han 42% da las manadras e dals manaders dumandads inditgà, d'avair survegnì insumma nagin u memia pauc sustegn. Per exempel saja l'armada sulet sa gidada cun ospitals. Ed er tar ils custs supplementars sajan las chasas d'attempads vegnidas emblidadas. Uschia haja dà prescripziuns davart material da protecziun. Ils custs da quel n'hajan ils chantuns dentant betg surpiglià.
Blers dals dumandads han ultra da quai crititgà la strategia da testar dal Cussegl federal. Uschia fissi stà pussaivel dad evitar mortoris, sch'ins avess testà regularmain ils cussadents e las cussadentas da chasas d'attempads per chattar cas asintomatics.
Ils schurnalists da Tamedia han dumandà per lur retschertga radund 1'400 chasas d'attempads e da tgira cun tut en tut passa 160'000 cussadentas e cussadents.
Betg pauschalisar critica da questa retschertga
La critica da la retschertga saja pulit ferma. Tenor Diego Deplazes, vice-president da la conferenza da las chasas da tgira dal Grischun, na correspunda la critica betg a la situaziun en il Grischun. I saja pussaivel che singulas chasas n'èn betg stadas cuntentas cun il sustegn. Per gronda part saja il sustegn da las autoritads dentant stà fitg buns.
Sulettamain al cumenzament da l'emprima unda saja il focus da las autoritads cleramain stà sin ils ospitals. Pli ditg che la crisa haja cuzzà e dapli sustegn che las chasas da tgira hajan survegnì.
