Siglir tar il cuntegn

Header

purtret da l'eroport da Turitg
Legenda: Keystone
cuntegn

Crisa da corona Eroport Turitg ha puspè gì pli paucs passagiers

L’eroport da Turitg patescha vinavant da la crisa da corona. Il mars ha el dumbrà 228'050 passagiers. Cumpareglià cun la medema perioda da l’onn passà saja quai in minus da bunamain trais quarts. Quai ha communitgà il gestiunari da l’eroport.

Il dumber da sgols saja sa reducì per bunamain la mesadad – e quai malgrà che las consequenzas da la pandemia sajan gia sa mussadas il mars 2020. Gia lura è il dumber da passagiers rut en per 63,2% cumpareglià cun il mars dal 2019.

Minus da 90% – cumpareglià cun in mars normal

Il mars 2019 – cun corona anc lunsch davent – eran 2,43 milliuns passagiers viagiads sur l'eroport da Turitg. Cumpareglià cun il mars 2019, in mars «normal», è il dumber da passagiers pia sa reducì perfin per 90,6%. Il mais il pli nausch per l'eroport Turitg è stà enfin uss l'avrigl 2020, durant l'emprim lockdown l'onn passà. Là era il dumber sa reducì per 99% – be 27'000 persunas eran viagiadas sur l'eroport Turitg.

Dapli vitgira

Marcantamain meglier èsi ì cun il sectur da vitgira. Cun 33'038 tonnas vitgira en l'aria. Quai èn prest 30% dapli che avant in onn. Igl è er stà marcantamain dapli ch'il mais avant. Guardà sur l'entir quartal è la svieuta da la vitgira dentant sa sminuida per 8,8% – malgrà l'augment il mars.

RTR novitads 09:00

Artitgels legids il pli savens

Scrollar a sanestra Scrollar a dretga