La Viafier Retica sistescha il traffic da persunas sur il cunfin cun l'Italia. La mesira vala dapi oz avantmezdi fin a nov urden, sco la Viafier Retica scriva.
Sin ordinaziun da las autoritads talianas na circuleschan perquai nagins trens da persunas tranter Campocologno e Tirano. Il traffic da rauba resta dentant intact. La Viafier retica aveva gia sistì avant passa duas emnas ses trens dal Bernina Express en l'Italia.
Er tar la Viafier federala vala il medem
Gia dapi ier na curseschan nagins trens da persunas da las Viafiers federalas pli en e si da l'Italia. Il manaschi da tren da persunas saja vegnì sistì ad interim sin ordinaziun da l'Italia. Quai communitgescha la SBB via Twitter. Per quant ditg n'è anc betg vegnì definì.
Pertutgads èn trens regiunals che traversan il cunfin sco er las lingias da Euro City da Basilea–Brig–Milaun, Genevra–Brig–Milaun e Turitg–Milaun. Ils trens regiunals che traversan il cunfin vegnan vulvids en las staziuns svizras avant il cunfin. Ils trens da EC curseschan be fin Brig respectivamain Chiasso. La SBB cusseglia da consultar l'urari online. Il traffic da martganzia na saja betg pertutgà.
