Avant dus onns ha la delegaziun administrativa da las duas chombras dal Parlament federal decidì d’interrumper la sessiun da primavaira. Quai pervia dal coronavirus che sa derasava pli e pli fitg en la Svizra. Dad in di sin l’auter ha il Cussegl federal prendì las mastrinas enta maun, sco quai ch’i era previs en talas situaziuns. E pir il matg èn las duas chombras puspè sa radunadas a Berna ad ina sessiun extraordinaria, betg en Chasa federala mabain en las hallas da la BernExpo.
Quai schoc da betg pli esser abel da far la lavur e da betg pli pudair debattar e decider en chaussas che pertutgan l’entira Svizra ha tutgà il Parlament federal profund en l’intern. Blers e bleras han suenter ditg che quai na dastga betg pli succeder. Perquai ha la Cumissiun d’instituziuns politicas dal Cussegl naziunal elavurà duas iniziativas parlamentaras che duain preparar il Parlament federal per ina crisa futura.
Betg mo Berna
En emprima lingia duai la pussaivladad dal Parlament federal da sa radunar vegnir flexibilisada. La lescha dal parlament prevesa oz che las duas chombras sa radunan a Berna. Bain datti la pussaivladad da decider sessiuns extra muros, sco per exempel la sessiun d’atun il 2006 a Flem. Talas sessiuns sto il Parlament federal dentant decider a chaschun dad ina sessiun precedenta. En ina situaziun da crisa n’è quai betg pussaivel. La midada proponida duai pia midar quai.
Sesidas virtualas mo nagin parlament virtual
Vegnir reglada da nov duai era la pussaivladad da las parlamentarias ed ils parlamentaris da sa participar a moda virtuala a la sessiun ed a las sesidas da las cumissiuns. In Parlament federal dal tut virtual na duai dentant betg dar, declera la cumissiun.
Ella cumissiun ha ina clera maioritad sustegnì las midadas proponidas. Era il Cussegl federal ha declerà ch’el sustegnia da principi ina flexibilisaziun dal manaschi dal Parlament federal. Il Cussegl naziunal tracta las duas iniziativas questa saira e vegn il pli probabel a dar suatientscha a quellas.