Ils pensums che pertutgan ils fugitivs da l'Ucraina sajan entant repartids bain tranter Berna ed ils chantuns. Quai ha communitgà la Conferenza da las regenzas dals chantuns da la Svizra Orientala (ORK) suenter l'inscunter. Ina gronda sfida saja da metter a disposiziun a temp alloschis per ils fugitivs, sco er la coordinaziun cun offertas privatas.
Relaziuns stabilas cun ils vischins
Sco regiun da cunfin èn ils chantuns da la Svizra Orientala dependents d'ina relaziun stabila cun ils vischins. Quai per mantegnair la prosperitad economica en las regiuns da cunfin. Uschia veglian ils chantuns contribuir activamain a la furmaziun da las relaziuns tranter la Svizra e l'UE e gidar da chattar ina soluziun areguard la discordia tranter las duas unitads. Latiers tutga era ch'ils chantuns da la Svizra Oreintala voteschan ensemen cun lur partenaris davart differents temas en las regiuns da cunfin.
Dal Grischun èn stads a l'inscunter Christian Rathgeb e Jon Domenic Parolini.