Dapi 13 onns spetgan ils fans dad «Avatar» sin la cuntinuaziun dal classicher. L'emprim Avatar vala sco il film cun il pli grond success en l'istorgia dal film – en mintga cas vid las cassas cun total 2,92 milliardas US-dollars (radund 2,7 milliardas francs). Uss, cun 8 onns retard, è il segund film finalmain en ils kinos: «Avatar - The way of water».
Purtrets impressiunants – Istorgia pauc profunda
Era quest film è impressiunant cun ses maletgs ch'èn vegnids filmads cun ina camera da 3D sut l'aua. Las passa trais uras èn ina experientscha visuala ch’ins n’ha betg uschè savens en il kino. Ins sfundra ensemen cun ils caracters principals sut l'aua en ina natira plain colurs e glischs.
L’istorgia dal film na persvada dentant betg uschè fitg sco ils purtrets. Las figuras na fan betg in grond svilup da caracter e restan superfizialas. Era l'antagonist n’ha nagina profunditad. L’istorgia quinta da l’amur dad ina famiglia, dal fugir e dal respect envers la natira. Dentant na capita nagut nunprevis ed era las structuras restan magari conservativas.
Tuttina è «Avatar – The way of water» ina experientscha unica ch’ins n'ha segir anc mai vis uschia. La tecnica da 3D sut l'aua è nova ed ils maletgs èn unics. Damai: Era sche l’istorgia na persvada bettg dal tuttafat, è schont mo l'experientscha visuala impressiunanta ed unica.