Il film «Platzspitzbaby» sa basa sin il cudesch cun il medem num da Michelle Halbheer. Igl è ina istorgia autobiografica che raquinta la vita da Michelle Halbheer che ha vivì sco buoba da 10 onns tar sia mamma ch’è ferm dependenta da drogas e che la buoba n’avess strusch betg survivì l’uffanza.
Cuntegn
En il film vai per la giuvna mamma Sandrine (giugada da Sarah Spale) e sia figlia dad 11 onns, Mia (giugada da Luna Mwezi). Sandrine è grevamain dependenta da drogas e suenter ch’il Platzspitz vegn serrà la fin dals onns 90, va ella a star cun sia figlia en la Part Sura Turitgaisa. Ella vuless porscher a sia figlia ina megliera vita, quai che na gartegia insumma betg.
Sandrine na vegn betg davent da las drogas e prenda savens cun sia figlia sin trips en la citad. Ella è magra, ha egls foppads ed è savens agressiva e negligenta – er envers la buoba.
Ed era sch’ins spera sin in happy end, pli ditg ch’il film va e pli ferm ch’ins senta che la dependenza da las drogas vegn ad esser pli ferma che l'amur tar sia figlia Mia.
Critica dal film
Era sche la scena da drogas a Turitg era avant che jau sun insumma naschida, ha il film tschiffà mai davent l’entschatta.
Il film ha propi persvas. Ils acturs han giugà grondius, cunzunt la giuvna da 12 onns, Luna Mwezi. Ella è vegnida da purtar vi quellas emoziuns ed ins ha gì massa empatia cun ella. Ma era la Sarah Spale che gioga la mamma, ha giugà suveran. Ins cumpra giu ad ella davent l’entschatta ch’ella è in «junkie» che charezza la figlia, ma la dependenza tar las drogas è simplamain memia gronda.
Il film è propi in chaos da sentiments. En in mument han ins puspè la speranza che tut vegn bun ed en l’auter vegnan ins puspè trumpà.
Il sulet che na ha betg plaschì uschè bain è, l’ami che Mia ha en ses mund imaginar. El na va insaco betg a prà cun l’istorgia. El è enturn 20 onns, musicant ed insaco sa tratgs en in zichel sco in clown. Là avess jau forsa creà in’autra figura – ma uschiglio ha il film persvadì mai.
RTR actualitad 07:00