L’onn 2016 è in aviun da cumbat F/A-18 da l’Armada svizra sgulà en in piz en la regiun dal Pass dal Susten. Il pilot è mort. Uss ha la giustia militara accusà in controllader dal traffic aviatic da Skyguide ed in auter pilot da l’armada. Tenor l'inquisiziun ha Skyguide dà al pilot l’instrucziun d’ascender sin radund 3’000 meters. Curt suenter è il pilot collidà cun il piz da passa 3’300 meters.
Accusaziuns grevas
Ils dus ston sa responsar pervi da omicidi accidental, nunobservaziun e negligientscha da prescripziuns da servetsch, disturbi per negligientscha dal traffic public sco er abus e sfarlattim da material. Per els vala fin ad ina sentenzia legalmain valaivla la presumziun d’innocenza.
Quai è capità
Tar l’accident eri vegnì tar in trenament d’in sgol da cumbat. La patruglia era partida da la plazza aviatica militara a Meiringen en il chantun Berna. Ils dus F/A-18 avessan gì d’exercitar il cumbat d’aria cunter in F-5-tiger. Pervi da nivels n’avevan ils pilots nagin contact da vista ed èn sgulads tenor reglas da sgol d’instruments.
Il disgrazià ha pli tard vulì suandar ses collega, il leader, cun agid dal radar. La tschertga dal radar saja malreussida, uschia scrivan ils inquisiturs militars en il rapport final.
