Ina gronda part da quels respargns vul la banca cuntanscher cun transferir plazzas da Londra en lieus pli bunmartgads. Qua lavuran il mument 2’400 persunas. En Svizra crodian davent fin 1’600 plazzas ils proxims 3 onns.
Tenor il CEO da la banca Credit Suisse, Tidjane Thiam, saja questa reducziun da plazzas da surmuntar senza desditgas. En tge sectur che las plazzas vegnan stritgadas n'ha Thiam però betg dà enconuschent.
A medem temp ha la banca er communitgà las cifras per il terz quartal. Malgrà ch'ils analists avevan fatg quint cun ina perdita noda la banca in plus da 779 milliuns francs. Il gudogn è cunquai però sut quel dal medem quartal da l'onn passà.
Aczia da la CS croda ferm en il minus
Las aczias da la Credit Suisse èn crudadas marcantamain suenter che la banca ha preschentà ses plans da restructuraziun. Paucas uras suenter la communicaziun nudava l'aczia da la CS in minus da passa 5%.
Dasper las cifras da quartal dischillusiunantas èn ils analists er sceptics en vista a la nova strategia.
Uniun da persunal fa quitads
L'uniun da persunal da bancas fa quitads che la Credit Suisse reducescha 1’600 plazzas en Svizra. Bain quinta l'uniun ch'ils plans da reducir plazzas senza relaschar persunal sajan matematicamain realistics en vista ad ina fluctuaziun d'enturn 9% tar la CS. Ed er sch'il program accumpagnant ed il coaching per tals che tschertgan plazzas sajan buns tar la CS, dettia adina puspè glieud che vegnia a la curta. Problematic saja era che pli pauca glieud stoppia ussa persequitar finamiras anc pli pretensiusas.
RR novitads 07.00