Il secretariat saja vegnì infurmà dal corp da guardias da cunfin davart ils cugliunaders, ha declerà il pledader dal Secretariat da stadi per la migraziun, Reto Kormann a l'agentura da novitads Svizra. El conferma in tal rapport da la gasetta romanda «Matin Dimanche». Tenor quest rapport hajan ils cugliunaders er en mira esters che vivan en Svizra.
Ils cugliunaders pretendan dad esser collavuraturs dal secretariat u da la polizia federala Fedpol. Las unfrendas vegnian contactadas per englais. Ils cugliunaders smanatschian ch'els stoppian turnar en lur patrias sch'els na pajan betg ils daners.
En nagins cas è quai l'agir da las autoritads
Quai na correspundia en nagins cas a l'agir dal secretariat u da Fedpol, ha declerà Kormann. Per ils fugitivs saja la situaziun dentant delicata. Els pudessan pensar ch'i portia ad els in avantatg sch'els pajan daners cura ch'i tramettan lur dumonda per asil.
Il Secretariat da stadi per migraziun haja reagì e sensibiliseschia uss ils fugitivs en lur centers. Er ils chantuns sajan infurmads davart ils cugliunaders.
Fedpol porta plant
Il pledader da Fedpol, Thomas Dayer ha ditg sin dumonda che Fedpol portia plant cunter ils cugliunaders. El cusseglia er als pertutgads da far quai. Quantas persunas che sajan pertutgadas saja dentant grev dir. Er da tge summas ch'i sa tractia n'ha Korman betg vulì dir.