Las polizias svizras averteschan da criminals che nizzegian ora la situaziun actuala. Uschia ha la Polizia chantunala da l'Argovia survegnì durant las ultimas duas emnas radund 60 annunzias pervi da telefons da cugliunaders. Er tar la Pro Senectute sajan senioras e seniors s'annunziads. En il Vallais sajan perfin enconuschent cas da persunas ch'hajan fatg amogna da far cumpras. Ils seniors han lura dà daners als cugliunaders ed hajan lura spetgà adumbatten sin lur cumpras empustadas.
Sch'era vus duvrais agid per far cumpras, porschan diversas uniuns ed era il chantun agid. Qua chattais las infurmaziuns necessarias:
Er Europol avertescha da cugliunims
L'autoritad da polizia europeica, Europol ha constatà che criminals nizzegian or la crisa da corona. Criminals hajan adattà a moda svelta lur metodas durant questa pandemia e profiteschian da la crisa da corona. Uschia saja s'augmentada la vendita da mascras da protecziun faussas, dischinfectant u medicaments fauss. Criminals nizzegian la situaziun che questa rauba è il mument stgarsa.
Il mars hajan ins chattà tar acziuns mundialas, radund 34'000 mascras da protecziun chirurgicas sfalsifitgadas, inditgescha Europol. Il rapport dad Europol mussa in exempel d'ina interpresa europeica che ha cumprà mascras e dischinfectant per 6,6 milliuns euros da Singapur. La rauba n'è mai arrivada.
Sfalsifitgads vegnian era medicaments antivirals sco il medicament cunter malaria, Chloroquine e preparats da vitamins. Dasper ils products fauss, avertescha Europol er da criminalitad online. Bleras persunas lavurian da chasa anora e sa collian sur computers betg uschè segirs en il sistem da firmas ed organisaziuns.
