Siglir tar il cuntegn

Svizra Cumbat cunter ils pretschs auts

Sut il squitsch da l'iniziativa da pretschs fairs vul il Cussegl federal cumbatter ils pretschs auts en Svizra. Ils iniziants reageschan a moda positiva sin la cuntraproposta.

Boxas.
Legenda: La Confederaziun vul far dapli cunter ils pretschs auts en Svizra. Keystone

Il Cussegl federal metta en discussiun ina midada da la lescha da cartel per uschia bloccar l'uschenumnà «supplement svizzer». Interpresas fermas al martgà duain vegnir obligadas da furnir lur rauba en Svizra er sur chanals da furniziun exteriurs. Uschia èn pussaivels imports parallels. Quai scriva il Cussegl federal en ina communicaziun.

Ozendi nizzegian furniturs esters lur pussanza al martgà cun pretender il supplement svizzer sin lur products.

Lantschà l'iniziativa per pretschs pli fairs ha la Fundaziun per la protecziun da consuments, Gastrosuisse e l'associaziun economica Swissmechanic che cumpiglia 1'400 manaschis da la branscha da maschinas, electro e da metal.

Reacziun dals iniziants

La cuntraproposta indirecta dal Cussegl federal vesan ils iniziants da l'iniziativa per pretschs fairs sco pass en la dretga direcziun. I saja dentant memia baud da ponderar da retrair l'iniziativa.

Trumpads èn tuts trais co-presidents dal comité d'iniziativa ch'ils Cussegl federal na sustegna betg lur iniziativa. La proposta da schlargiar il scumond d'abus er sin interpresas pussantas al martgà gaja dentant en la dretga direcziun.

RR novitads 14:00