Siglir tar il cuntegn
Inhalt

Svizra Cumbat cunter iniziativa da fair-food è lantschà

Il comité cunter l’iniziativa fair-food ha lantschà il mardi il cumbat da votaziun a Berna. L’iniziativa mainia tenor els ad in'isolaziun dal martgà e vess consequenzas negativas per ils consuments.

Purtret d'in maun che piglia si in'oranscha en ina stizun.
Legenda: Ils adversaris èn da l'avis che l'iniziativa da fair-food saja manegiada bain, ella giaja dentant memia lunsch. Keystone

Tenor il comité cunter l’iniziativa da fair-food avess l’iniziativa sco consequenza che las mangiativas vegnissan pli charas, ed er l’elecziun en las butias vegniss pli pitschna. L'iniziativa saja manegiada bain, però giaja ella memia lunsch. Er pudess l'iniziativa avair tenor ils adversaris barrieras per cunvegnas da commerzi internaziunalas, cun quai che la Svizra stuess uschia discriminar tscherts products. L'iniziativa vul che be pli las mangiativas ch'èn producidas fair ed a moda persistenta pon vegnir importadas.

Parlament e Cussegl federal proponan da dir da na a l'iniziativa.

Dasper l'iniziativa da fair-food decida il suveran svizzer ils 23 da settember er davart l'iniziativa per la suveranitad alimentara e davart il conclus federal davart las vias da velo.

RR novitads 12:00