Siglir tar il cuntegn
Inhalt

Svizra Cumbat cunter resistenzas a l'antibiotica cuntinuescha

En Svizra moran mintg'onn var 300 persunas pervi d'infecziuns cun bacterias resistentas a l'antibiotica. Raschun per quai è il diever inadequat dad antibiotica. Las premuras dad experts ed autoritads han fin uss mo pitschen success.

Bacterias en vaider da reagenza.
Legenda: Bacterias resistentas a l'antibiotica sa derasan vinavant. Keystone

Il cumbat cunter resistenzas a l'antibiotica na saja anc betg gudagnà, ha ditg il directur da l'Uffizi federal da sanadad BAG, Pascal Strupler, il venderdi a Berna. Ensemen cun ulteriurs uffizis federals ha il BAG preschentà il rapport da resistenza 2018.

Antibiotica vegn duvrà pli pauc savens

La buna novitad è ch'il diever d'antibiotica sa reducescha en Svizra. Tar tractaments ambulants è il diever d'antibiotica sa reducì aifer dus onns per 5%, quai resulta d'in rapport da l'Uffizi federal da sanadad publica. Tar tractaments staziunars è schizunt vegnì duvrà 10% pli pauc. Il 2017 han ils medis da chasa prescrit en 29 da 1'000 cas antibiotica. Intgins onns avant eran quai anc fin 40 cas.

Bacterias sa derasan

La schletta novitad è che bacterias resistentas a l'antibiotica sa derasan vinavant. Uschia èn tenor il BAG er las infecziuns entras bacterias resistentas a l'antibiotica s'augmentadas. Per bunamain in terz da las infecziuns saja la bacteria da la beglia Escherichia coli responsabla. En tut sajan ozendi 20% da quellas bacterias resistentas cunter antibiotica. Quai sajan dubel uschè bleras sco l'onn 2004, communitgescha il BAG.

Tenor il center svizzer per resistenzas a l'antibiotica (Anresis) èn il 2015 276 persunas mortas en Svizra entras bacterias resistentas a l'antibiotica. Il dumber d'infecziuns cun talas bacterias ha muntà a 7156.

RR novitads 14:00