- La societad aviatica Swiss ha gudagnà marcantamain pli pauc l'emprima mesadad da l'onn pervi da squitsch da pretschs e custs pli auts.
- L'emprima mesadad 2019 ha la Swiss fatg in gudogn operativ da 245 milliuns francs (emprima mesadad 2018: 322 milliuns).
- Cumpareglià cun l'onn passà è quai ina reducziun da 24%.
La svieuta è restada dal schaner fin il zercladur 2019 cun 2,58 milliardas francs sin nivel da l'onn passà, uschia communitgescha Swiss. Il gudogn da manaschi (EBIT) è sa reducì envers l'onn da record 2018 per stgars in quart sin 245 milliuns francs.
Squitsch da pretschs en l'Europa
La Swiss motivescha la reducziun per gronda part cun dapli custs per carburant. Vitiers sajan s'augmentads ils custs da mantegniment sin fundament da lavurs da mantegniments regularas (uschenumnads c-checks) sin la flotta modernisada.
Las surcapacitads en il traffic da l'Europa hajan manà ad in aut squitsch da pretschs e la finala haja er pli pauc traffic da rauba gì consequenzas negativas.
Durant il segund quartal da l'avrigl fin il zercladur è il gudogn sa sminuì cun 10% sin 197 milliuns francs marcantamain pli pauc che l'emprim quartal.
RR novitads 09:00