Siglir tar il cuntegn

Header

cuntegn

Cumbat encunter corona Sommaruga lauda la collavuraziun cun ils chantuns

La presidenta da la Confederaziun Simonetta Sommaruga e la regenza a Basilea han suttastritgà lur collavuraziun extraordinaria. Sommaruga è stada a Basilea per in barat cun represchentants da la regenza, da Roche e da l’ospital da l’universitad.

video
La presidenta da la Confederaziun lauda la collavuraziun.
Or da News-Clip dals 06.04.2020.
laschar ir

La collavuraziun cun l’industria da farmazia, las autoritads e cun l’associaziun da perscrutaziun internaziunala funcziuneschia fitg bain, ha ditg Sommaruga suenter l’inscunter.

L'exit n'è betg ina dumonda politica.
Autur: Simonetta Sommarugapresidenta da la Confederaziun

Ina buna collavuraziun cun ils chantuns, che stoppian la finala realisar las mesiras da la Confederaziun, saja extrem impurtanta. Quella saja tut tenor regiun però differenta. Tar il Tessin per exempel gioghia il fatg ch’il chantun è ordvart pertutgà ina gronda rolla, Basilea sa fetschia tranter auter valair sco lieu per impurtantas interpresas da farmazia. Qua ha la Cussegliera federala ludà l’engaschament da Roche quai che pertutga las pussaivladads da sviluppar tests, terapias sco er in vaccin per cumbatter il coronavirus. Sin quest sectur possia la Svizra giugar ina rolla impurtanta.

Franà las speranzas

En la discussiun davart schluccar las mesiras ha Sommaruga franà speranzas memia grondas. In exit saja la finala betg ina dumonda politica. La Confederaziun ed ils chantuns stoppian sa basar sin cussegls dals experts da sanadad. Uschè spert na vegnia la fasa da l’inteschertezza e la chargia per la glieud e l’economia betg ad esser a fin.

Er per il proxim pass dovri la collavuraziun cun ils chantuns.
Autur: Simonetta Sommarugapresidenta da la Confederaziun

La Confederaziun veglia però planisar ils proxims pass ensemen cun ils chantuns. Las cussegliaziuns da cumportament restian però er en l'avegnir la pli impurtanta mesira.

Anc memia baud per la Svizra

Er il cusseglier federal, Alain Berset, è s'exprimì oz glindesdi davart las mesiras cunter il coronavirus. Il Cussegl federal veglia infurmar il pli tard enfin ils 16 d'avrigl davart ils proxims pass en connex cun il coronavirus, ha ditg il minister da sanadad suenter ina sentupada cun represchentants da las autoritads da sanadad dal chantun Valais.

El haja prendi per enconuschientscha che l'Austria ha annunzià da vulair schluccar ils scumonds – per la Svizra saja quai anc memia baud – uschia Berset. L'Austria haja la mesadad dals cas confermads da corona cumpareglià cun la Svizra. La Svizra dumbra actualmain passa 21'300 cas confermads dal coronavirus.

RTR novitads 17:00

Artitgels legids il pli savens

Ir a sanester Ir a dretg