Siglir tar il cuntegn

Header

cuntegn

Svizra Cumbat per iniziativa da fair-food cumenza

La Confederaziun duai promover victualias che schanegian l’ambient ed ils animals, e che vegnan producidas a moda faira. Quai vul l’iniziativa da fair-food che vegn la fin da settember avant il pievel. La gievgia ha cumenzà la campagna dals iniziants.

La finamira d’avair victualias che schanegian l’ambient ed ils animals, e che vegnan producidas a moda faira, duai da princip era valair per imports. La Confederaziun stoppia fixar las pretensiuns e procurar che products importads adempleschian quellas. Tenor ils iniziants per fair-food pudess quai era succeder cun auzar ils dazis d’import.

Pauc interess en la politica

Actualmain spetgian impurtantas decisiuns politicas per l’agricultura e per l’economia d’alimentaziun, tant en il parlament sco er en il Cussegl federal. Quai scriva il comité d’iniziativa. Deplorablamain na sajan reglas en favur da l’ambient e dals animals e standards socials para betg impurtantas en quests process politics.

Lantschada dals Verds

L'iniziativa da fair-food saja realisabla senza cuntrafar al dretg commerzial, quai punctueschan ils iniziants. Fatg l'iniziativa han ils Verds, sustegn survegnan els d'organisaziuns da l'ambient, gruppaziuns da l'agricultura e d'organisaziuns dals consuments.

En votaziun vegn l'iniziativa federala «Per victualias saunas sco er producidas en moda ecologica e faira (Iniziativa da fair-food)» ils 23 da settember. Tant il Cussegl federal sco er il parlament cusseglian da refusar l'iniziativa.

RR novitads 12:00

Artitgels legids il pli savens