Actualmain na vegnia la palusa bletscha tar nursas betg cumbattida tuttina ferm en tut ils chantuns, ha argumentà Hansjörg Hassler avant in onn cura ch’el ha inoltrà la moziun. Quai fetschia difficila la situaziun, per exempel sin las alps. Per ils purs muntia la malsogna savens perditas economicas e gronda lavur per tractar las nursas.
Damai ch’il Cussegl naziunal aveva gia approvà la moziun, è il Cussegl federal ussa obligà da fixar la palusa bletscha sco malsogna en la lescha davart epidemias d’animals.
Malsogna era da chattar tar selvaschinas
La palusa bletscha datti surtut tar nursas, dentant era tar chamutschs e capricorns. I sa tracta d’ina malsogna dolurusa ch’attatga las unglas dals pes. Animals cun la palusa bletscha ves’ins magari a pascular en schanuglias sin las pradas.
“Era il rir po esser infectus”
Durant preschentar la moziun al Cussegl dals chantuns ha la presidenta da la cumissiun da scienza Géraldine Savary (PS Vad) stuì cumenzar a rir. Ella n’è strusch pli vegnida da leger giu las pretensiuns per cumbatter la palusa bletscha tar nursas. Il cusseglier federal Alain Berset ha surpiglià il pled ed ha ditg, “betg mo la palusa bletscha tar las nursas è infectusa, mabain era il rir en il Cussegl dals chantuns”.
La raschun per las risadas pudess esser, che la moziun per cumbatter la palusa bletscha è stada la segunda fatschenta en connex cun animals. Ordavant aveva il Cussegl dals chantuns tractà ina moziun dal cusseglier naziunal Oscar Freysinger (PPS Valais) per scumandar l’import dad alas da squagls.