La Confederaziun vul stumar radund 480 viagiaturas e viagiaturs svizzers ch'èn vegnids repatriads ord lur vacanzas al cumenzament da la pandemia da corona. Fin oz n'hajan quellas persunas betg pajà ils custs per lur sgols, ha il Departament federal per affars exteriurs communitgà sin dumonda da la SonntagsZeitung.
70 ulteriurs quints ha la Confederaziun stuì stritgar pervi d'indicaziuns mancantas u manglusas. E cun radund 160 persunas ha la Confederaziun fatg ina cunvegna da pajar ils custs da viadi en ratas. Quant gronda che la summa anc betg pajada è, na po il Departament federal per affars exteriurs betg dir. Tenor calculaziuns pudessan quai dentant esser passa 630'000 francs.
Cun la pli gronda acziun da repatriaziun en l'istorgia svizra ha il departament purtà a chasa millis da turistas e turists svizzers da l'exteriur. L'acziun ha custà la Confederaziun 10 milliuns francs. Passa 7'000 persunas han survegnì in quint.
Ord l'archiv da 10vor10:
