Dario Cologna è sa participà a quatter gieus olimpics d'enviern – 2010 a Vancouver, 2014 a Sotschi, 2018 a Pyeongchang ed il 2022 a Peking. En tut ha el gudagnà quatter medaglias d'aur. In record unic enfin oz: Sco unic passlunghist da l'istorgia olimpica ha el gudagnà trais giadas en seria aur sur la medema distanza, ils 15 kilometers, la davosa giada oz avant otg onns.
Era suenter la fin da sia carriera activa è Olimpia preschent per l'um da 39 onns. Actualmain è Cologna en funcziun sco expert da SRF per ils gieus olimpics. Ultra da quai s'engascha el en la suprastanza dal project Olympia 2038, ch'examinescha eventuals gieus d'enviern en Svizra. E gievgia sa decida sch'el represchenta en il futur era las atletas ed ils atlets en la cumissiun d'atlets dal IOC.
Tge fa la cumissiun dals atlets dal IOC?
La cumissiun d'atletas e d'atlets dal IOC consista da maximalmain 23 commembras e commembers e represchenta ils interess d'atletas e d'atlets da tut il mund entaifer il moviment olimpic. Ella cusseglia l'IOC en cas da decisiuns davart reglas, lieus d'occurrenza, infrastructura e fairplay e sustegna era sportistas e sportists en dumondas davart lur carriera suenter la carriera.
A l'elecziun actuala stattan a disposiziun dus sezs. Totalmain candideschan 11 candidatas e candidats, tranter quels Dario Cologna. Il dretg da votar han las atletas ed ils atlets che participeschan als gieus olimpics d'enviern.
Ina premiera per la Svizra?
Per la Svizra fiss ina elecziun da Cologna en la cumissiun d'atletas e d'atlets ina premiera. Bain ha l'IOC ses sez a Losanna, ina represchentanza svizra directa or dal ravugl da las atletas e dals atlets manca fin uss. Las anteriuras candidaturas da Sergei Aschwanden, Didier Cuche e Florence Schelling èn restadas senza success.
Sustegn survegn Cologna da Swiss Olympic. La presidenta Ruth Metzler-Arnold punctuescha, en in'anteriura communicaziun a las medias, l'impurtanza da la candidatura: En l'avegnir duai la Svizra surpigliar dapli responsabladad en il sport internaziunal. Cologna è in dals pli impurtants ambassadurs dal sport svizzer dals ultims onns.
Tadlar ed intermediar.
Cologna sez vesa cleramain sia rolla tar las atletas ed ils atlets. El veglia acceptar giavischs, intermediar e trair a niz meglier las structuras existentas – en vista a gieus pli persistents, decentrals ed ad integrar pli fitg las sportistas ed ils sportists en process da decisiun.
En emprima lingia èn ins represchentants da tut ils atlets e betg mo svizzers.
En il medem mument possia esser pli simpel per atletas ed atlets svizzers d'avair ina vusch directa en l'IOC.
Sche Dario Cologna po far quest proxim pass entaifer il moviment olimpic, sa decida ils 19 da favrer. Alura voteschan las atletas ed ils atlets als gieus d'enviern en l'Italia davart la cumposiziun da la cumissiun d'atletas e d'atlets dal IOC.