Il quart enviern suenter l'entschatta da la guerra en l'Ucraina, ed uschia era la crisa d'energia, è la situaziun bain sa calmada en il martgà d'energia - però betg anc schliada. A questa conclusiun vegn la cumissiun federala per electricitad (ElCom) en ses rapport annual. Per l'enviern che vegn saja la situaziun da principi buna. Intschertezzas vesa ella surtut en connex cun renovar las reservas da gas europeicas. Las reservas sajan plitost bassas ed ils impuls dal martgà sajan reducids, uschia ch'i dettia dubis davart il tempo e las dimensiuns che las reservas possian vegnir renovadas – pia ch'ils deposits sajan puspè plains, communitgescha la ElCom.
Dependenta da la producziun dals vischins
Las reservas europeicas èn impurtantas era per la Svizra, nua che la producziun d'electricitad dependa era da la producziun dals stadis vischins. Uscheditg che la Svizra possia importar per in pretsch raschunaivel, ed ils stadis vischins han avunda electricitad e naginas stretgas, lura saja quai nagin problem.
Sco per exempel era durant l'enviern passà. Quai è stà il cas cun las capacitads da las ovras atomaras franzosas. E tuttina saja il pretsch en il martgà stà aut, uschia che la Svizra ha producì dapli e pli baud cun las ovras idraulicas. E tuttina eran las reservas a la fin da l'enviern passà anc bunas. Quai però grazia a mesiras preventivas da la Svizra en vista a la situaziun da provediment cun dapli aua en ils lais da fermada.
Vinavant procurar per reservas per l'enviern
Talas reservas dovria quai era en l'avegnir. Quai mussa tenor la ElCom era ina analisa a media vista dal gestiunari da la rait Swissgrid. Perquai ch'i na saja betg cler, quanta electricitad ch'ins possia importar, e quant spert che la producziun d'electricitad indigena possia vegnir schlargiada, dovria quai era reservas. Tantpli perquai che l'aura influenzeschia era pli e pli fitg la producziun d'electricitad europeica.
La ElCom recumonda da far reservas dad almain 500 uras megawatt enfin il 2030. Ed enfin ils 2035 reservas da 700 fin 1400 uras megawatt. En vista a la situaziun actuala saja quai raschunaivel dad etappar il proceder, per pudair adattar las reservas tut tenor ils basegns che sa dettian anc.