Siglir tar il cuntegn

Header

audio
Grazia a Nutri-Score mangiar pli sanadaivel?
Or da Co e cum dals 14.04.2021. Maletg: Keystone
laschar ir. Durada: 2 minutas 56 Secundas.
cuntegn

Cumparegliar products Grazia a Nutri-Score mangiar pli sanadaivel?

Il Nutri-Score è ina scala davent A stgir verd enfin E cotschen ch’inditgescha con sanadaivel ch’in singul product è. Ma i dat ina duas chaussas ch’ins sto resguardar sch’ins mira sin il Nutri-Score.

Sch'in product survegn la meglra nota, in A stgir verd, ni la mendra, in E cotschen, dependa da differents criteris. Buns criteris èn la quantitad da fritgs, legums, favs, nuschs, ielis, substanzas da ballast e alv d'ov. Negativs criteris èn zutger, sal, schlets grass ed il dumber da calorias.

Dentant stoppian ins dar adatg cun sa referir memia fitg sin il Nutri-Score, di l'experta per metabolissem Anne Katrin Borm, envers SRF Puls.

Funcziun

Il Nutri-Score è bun per cumparegliar sumegliants products. Pia per mirar tge jogurt, ni tge pizza schelentada ch'è la pli sanadaivla, dentant betg per cumparegliar il jogurt cun la pizza. Pertge sch'ina pizza ha in Nutri-Score A stgir verd, n’è ella savens betg pli sanadaivla ch'in jogurt cun in D oransch, di la media.

Ins na po betg cumparegliar in jogurt cun ina pizza, perquai che quellas duas chaussas han tut autras valurs en noss nutriment.
Autur: Anne Katrin Borm experta per metabolissem

Problems dal Nutri-Score

In segund problem dal Nutri-Score è, ch'el mussa be quant sanadaivel ch'il singul product è, dentant betg sch'ins mangia era equilibrà.

Pia, sch'ins mangia tut las substanzas ch'ins duess en in di. Tar quai tutgan vitamins, alv d'ov ed idrats carbonics, declera la media.

Nus avain in nutriment manglus sche nus mangiain be sumegliants products da la categoria A. Per exempel, sch’ins mangia be fritgs conservads che tutgan tar la categoria A, na mangian ins betg in gram alv d'ov .
Autur: Anne Katrin Borm experta per metabolissem

La davosa sfida che Anne Katrin Borm numna è, ch'inditgar il Nutri-Score è voluntari. Pia poi esser ch'in product che n’è betg inditgads, fiss pli sanadaivels ch'in sumegliant product ch'è inditgads cun in B cler verd. Perquai vuless la Migros nudar il Nutri-Score enfin il 2025 sin tut ses agens products. Nestlè fa gia uss quai sin bunamain tut ses products e Coop è era vid introducir il Nutri-Score.

Pia, resumà, il Nutri-Score è ina buna indicaziun per cumparegliar sumegliants products, dentant betg la suletta sch'ins less sa nutrir sanadaivel.

RTR actualitad 11:00

Artitgels legids il pli savens