Siglir tar il cuntegn

Header

cuntegn

Svizra Cumplexitad politica intimidescha giuventetgna

Per ina gronda part dals giuvenils è la furmaziun politica ozendi fitg u pulit impurtanta, ma la cumplexitad da la politica tegna davent blers dad els dad ir a votar.

Cunzunt giuvenils che n’han anc betg il dretg da vuschar sco er quels ch'han gist da nov quest dretg spetgan bler da discussiuns davart temas politicas. Quai demussa ina retschertga che l'institut gfs.Berna ha fatg sin incumbensa da l'Uniun tetgala dals parlaments da giuventetgna.

Ils temas ch'occupeschan ils giuvenils il pli fitg èn la politica dals esters e d'asil. Er fitg impurtant è tenor la retschertga la discussiun generala davart il sistem politic en Svizra.

Motivaziun è qua

Motivads da sa fatschentar cun la politica vegnian ils giuvenils cunzunt dals geniturs e da parents, ma er adina dapli dad amis e da camerats da scola. Quai communitgescha la plattafurma «easyvote» che vul porscher in agid da votar. Quai cun infurmaziuns neutralas, formuladas en ina lingua bain chapibla cun maletgs e filmins.

Linguatg cumplex sco impediment

Da l'autra vart tegnia la cumplexitad dal linguatg politic davent blers giuvens da las urnas. Ultra da quai existia er ina tscherta disfidanza envers il process politic u sia effizienza.

La retschertga da l'atun passà sa basa sin intervistas cun 1'477 giuvnas e giuvens da 15 fin 25 onns da 25 scolas differentas en Svizra.

RR novitads 07:00

Artitgels legids il pli savens