La cumissiun da gestiun dal Cussegl naziunal ha examinà la cumpra da mascrinas durant l'emprima fasa da la pandemia, dal schaner fin il zercladur 2020. En ses rapport vegn ella tranter auter a las suandantas conclusiuns:
- I saja grev da chapir ch'il Cussegl federal ed il Departament federal da defensiun (VBS) hajan surdà l'incumbensa da la cumpra a l'apoteca da l'armada senza dar a quella er dapli resursas. Tant pli ch'i saja stà ina gronda e per part er cumplettamain nova incumbensa.
- Perquai che questas resursas supplementaras han mancà, sajan las controllas da qualitad vegnidas tralaschadas.
- Sco consequenza da las controllas da qualitad tralaschadas, hajan ins manchentà pussaivladads da reclamar u termins da sa retrair da contracts da furniziun per mascrinas ch'eran da schletta qualitad.
- La controlla da qualitad saja anc stada pli greva perquai ch'i na dettia en Svizra nagin labor che saja qualifitgà per testar la qualitad da mascrinas (er uss anc betg).
- Plinavant na cuntentia la transparenza en connex cun la cumpra da mascrinas betg. Er per la cumissiun da gestiun saja stà grev da survegnir explicaziuns ed infurmaziuns cleras areguard las fatschentas cun mascrinas. Il departament haja respundì pliras giadas a moda nunsufficienta e betg clera.
La dumonda schebain ils pretschs che la Confederaziun ha pajà per las mascrinas sajan stads giustifitgads u betg, quai n'è betg part da questa examinaziun. En quest connex èn anc avertas duas proceduras penalas e la cumissiun da gestiun spera che questas proceduras possian anc respunder a las dumondas che sajan anc avertas en connex cun la cumpra da mascrinas. Areguard ils tests da qualitad, cusseglia la cumissiun da sclerir schebain i faschess senn d'endrizzar in tal post qualifitgà en Svizra.
Mancanzas pli gravantas che la cumpra sezza
Tenor la cumissiun da gestiun èsi però impurtant da dir che tut las persunas involvidas, tant da l'apoteca da l'armada sco er dal VBS hajan lavurà sut grond squitsch e cundiziuns pretensiusas e mussà grond engaschament. Sut questas cundiziuns capitian sbagls ed i saja er cler che l'incumbensa da cumprar mascrinas entras l'apoteca da l'armada saja sa dada perquai ch'ins haja manchentà oravant da far las preparativas necessarias per il cas da pandemia. Per quests sbagls na saja ni l'apoteca da l'armada ni il departament la culpa. Uschia concluda la cumissiun da gestiun lura er ch'i dettia mancos pli gravants che la cumpra da mascrinas sezza:
- La Svizra n'è betg stada preparada avunda per il cas da pandemia – en spezial pertutgant material da protecziun sco mascrinas.
- Il Cussegl federal ed il VBS hajan manchentà da metter a disposiziun avunda resursas a l'apoteca da l'armada cura ch'els hajan surdà l'incumbensa.
- Ni il departament ni l'apoteca da l'armada hajan pudì sclerir fin ussa tschertas renfatschas che curseschian gia pli daditg.
Ils mancos en connex cun esser preparà per ina pandemia haja il Cussegl federal vis. Actualmain girian divers scleriments er davart la rolla da l'apoteca da l'armada en in tal cas. La cumissiun vegnia a sa laschar infurmar davart questas lavurs ed areguard la transparenza spera ella ch'il departament da defensiun emprendia ord quest cas.
